زمان لما كنا بنلعب كورة في الشارع .. كان بيجي ديما ولد غشيم كل ما يلاقي نفسه مهزوم ويعرف انه خلاص مش هيقدر يفوز .. يفضل بقى يعمل فولات جامدة يبقى هيموت ويعور حد .. خاصةً وهو أكبر مننا سنا يعني عنده باور أعلى مننا .. اللي بيشجعه على اسلوبه اكتر هو الحكم كان ديما في صفه ما بيحسبش أي فاول عليه .. بالعكس لو حد فينا قرب منه يحسب له خطأ فورا وممكن ضربة جزاء وأحيانا طرد مباشر .. كان ف كمان كام عيل كدا كانوا بيحبوا يتسلوا فيفضلوا يسخنوا فيه وهو بقى مصدق يخبط في دا ويضرب في دا واحنا ملتزمين وبنقول ف حكم يترد عليه .. كل دا علشان اليوم يكمل وما تحصلش مشاكل تبوظ اللعبة ... لكن كان واضح ان التسلية خلت المسخنتية ينسوا إننا ممكن نتصاب اصابات جامدة وإن اليوم كله ممكن يبوظ أو يجي حد كبير من الشارع أو من بره يدينا على قفانا ويقول بلاش لعب عيال تاني, وكفايا لحد كدا. وطبعا مستحيل بعدها أي حد يقدر يلعب تاني في الشارع لا المسخنتية ولا صاحبنا الغشيم, يعني أي حد ممكن ينزل يلعب بعدها هياخد على قفاه, والحجة موجودة اننا مش بنعرف نلعب بأدب وبنعور بعض وإننا داوشين الجيران .. أصل اللعب له أصول وقواعد .. حتى لو اتهزمنا مش هينفع ما نلتزمش بها. لكن الحقيقة اللي بتخلي صاحبنا الكبير يعترض .. انه بينام شوية بعد الضهر وبيشوف في منامه بعض الأحلام السعيدة لكن للأسف ما بتكملش لعبنا كان هيبوظها عليها ... لعبنا كان بيقضي على أحلامه .. كل كورة كانت تدخل الجول وبتقربنا من الفوز كانت بتخلي حلمه كابوس ... علشان كدا كان بينتظر كل فرصة يعطل فيها اللعبة .. المشكلة بقى إن المسخنتية في النهاية بيسيبوا الغشيم وبيجروا على الكبير ورغم انه ملهوش في الكورة خالص إلا إن المسخنتية هللوله وطبلوله لما قال انه هينزل يعلمنا اللعب ... المفاجأة بقى إن الغشيم هلله هو وطبله وفضل يرقصله هو كمان وقال إن الكبير لو نزل يلعب أنا مش هنافسه .. الكبير كان عامل حسابه بالنسبة للمفاعيص الحريفه بتوع الشارع وقال مش عاوز اشوف العيال دي تاني واتهمهم انهم بيبوظوا اللعب ... الحقيقة بقى إن الكبير كان عارف مستواه الضعيف وكان عارف انه مالهوش فيها .. علشان كدا قرر يلعب مباراة استعراضية ياخد فيها الشارع على حسابه .. يعني يسيطر على الكوره وياخد الحكم تحت جناحه والمطبلاتيه مش محتاجين توصيه المهم انهم خلصوا من العيال المفاعيص بتوع القواعد وقوانين اللعبة والفير بلاي.
اللي عايز أعرفه دلوقتي بالنسبة للغشيم والمطبلتية ظروفكم ايه في اللعب جاهزين للضرب على القفة والدلدلة علشان يسيبكم الكبير ترمرموا واره أي خمس دقايق مش محتاجهم؟؟؟
محمد عمر الناظر
0 التعليقات:
إرسال تعليق