محمد عمر الناظر : من غير زعل .... لماذا نعم للدستور ؟؟؟

 

    حسبتها كتير واكتشفت انه ما فيش حل غير النزول والمشاركة في الاستفتاء على الدستور, وبما إنه كل واحد له الحرية المطلقة في الإختيار بين نعم أو لا, فسوف أختار نعم, مثلي مثل جميع من سينزل ليشارك في الدستور. شايف بعض الأصدقاء مستغربين من تغيير موقفي, فرجاءً ما تزعلوش مني, أنا حسبتها يمين شمال طول في عرض, فاكتشفت إن تأييدي للسيسي هو الحل لتخلص من الإخوان ورئيسهم المنتخب. يا راجل ما فيش انتخابات تحصل إلا ويكتسحوها يطلعوا عليهم اشاعات يتهموهم تهم عمال على بطال ليل ونهار, وفي الآخر تلاقي كابوس, لا شورى راحمين ولا شعب ولا انتخابات رئاسية ولا استفتاءات دستورية, قولي انت يا عم الزعلان من موقفي, نخلص منهم ازاي؟؟؟ لو عندك حل تاني غير اننا نتدلدل ونطاطي للعسكر لعل وعسى يعطفوا علينا بمقعد برلماني هنا أو هناك أو ترقية محترمة في الوزارة الفلانية, أو وظيفة علوي للعيال وعيال القرايب والخلان؟؟ انا راضي زمتك وضميرك, ليه ما ننزلش نختار دستور عمل من السيسي حامي الحمى وداكك حصون الأعداء على جبهتي رابعة والنهضة وفي كل قرية فيها خلايا ارهاب, ليه ما نختارهوش حاكم فوق أي رئيس منتخب, وبعدين هو يعني ايه رئيس متخب مالنا احنا ومال المصطلحات الحمضانة دي!!! بطلودا واسمعودا يا ولاد, على آخر الزمن وبعد ستين سنة واكتر واخدين فيها على حكم العسكر وراكب على روسنا ورجلينه مدلدل قال نعيش دور الديمقراطية والمدنية, انا عايز أعرف مين ابن الـ(...) دا اللي كان مش مبطل ايام الإخوان وما فيش على لسانة غير الديمقراطية والمدنية وانه ما فيش حل غير المدنية والديمقراطية. قال مدنية قال!!!

المهم والحمد لله اهو السيسي جه يا ولاد واتخلصنا من الإخوان مش بالديمقراطية والإنتخابات والعياذ بالله, ابسلوتلي, ولكن بأرهبة الإخوان, واحنا طبعا مصدقين إنهم ارهاب زي ما صدقنا ان السيسي زمان اخوان وزي ما مصدقين دلوقتي إن امريكا واسرائيل والإتحاد الأوروبي بيدعموا الإخوان, والحمد لله مصدقين ان السيسي هو حامي الحمى وإنه بعيد تماما عن سيطرة داعمي الإخوان من الأمريكان والصهاينة والأوروبيين... خيبة تقيلة!!!!

المهم مش هخوض في تفاصيل دستور السيسي, لإن الدستور ناجح بيك أو من غيرك والأرقام اللي على مزاجنا هنعلنها, يعني ذوق عافية الدستور ناجح لإنه دستور وطني من الدرجة الأولى ومش هسمح لحد يناقشني فيه وأي حد يناقش أو يعترض أو يقول دستور فلول أو إنقلابي أو يدعوا للمقاطعة فهو إرهابي, ومتسألنيش إرهابي ليه ... اصل انا عن نفسي مش عارف هو ليه إرهابي.

محمد عمر الناظر